Mimang i Eklizia do dumadi do hobi po ko “hamin-inn”, di Samaritan tavasi montok di kitoluo

KOTA KINABALU – Mimang i Eklizia do dumadi do hobi po ko “hamin-inn” montok di tuhun-Samaria Tavasi, ii i Kristus, montok dii kitoluo, momimidouso ngaavi, dii tongomungkang, dii tangasampit, dii zaazadaan ngaavi id diho Archdiosis tu pinotoimaan dosido doid dioho ii Sakramintum do Kopongumaan dii Kitoluo (Sumakit), ontok Misa, 11 Feb 2020.

I Archbishop diho Archdiosis Kota Kinabalu, Archbishop John Wong, o minono-Misa, ontok dii Tadau Kitoluo Sompomogunan ko-28, id kaandaman doid di Haahangai dotokou do Lourdes, id Katedral Sacred Heart; noboos disido doid dii tuhun ngaavi diho diosis o hizab di Eklizia do minsomok, monoimo om monginggaan kosusaan.

Minanakadai disido do minono-Misa om pinopoumau tumau om pinapaampam pahad doid dii kitoluo ngaavi nopo ng ai faado paroki Fr Paul Lo om i panakadai faado Fr Russel Lawrine om Fr Saimon William.

Ontok minoboos, hobi no kozo doid dii ongoundoso do toluo, pinohombus di Archbishop ii pason di Pope, kokomoi do kahansanan montok diho kaantakan do “ais oi pokionuon di Jesus do mantad dii maso ngaavi tumaan do komungkangan, koundasaan om kinugui, nga osianan om   monginsasamod Isido dioho… tu i Jesus nga nokopiuman nogi haid do okugui, tuminaan do koundasaan tuhun om nokotoimo do koinsasamadan mantad di Tama”.

Doid dii potoguvang ngaavi do kalaja kohidasan om tosoosonguhun ii gumompi dii kitoluo, sinuu di Archbishop John Wong izioho do momohizo dii boos ngaavi do Pope, ii poposoto do kosian di Jesus montok saviavi ii kitoluo do monoimo “dii binaang do tuhun om koinsamakan posondii di Kristus, ii tuhun-Samaria Tavasi, kumaa doid dii kitoluo, om do okonko momohingos noopo nga momohizo nogi, tu sabap no do mimang o kohingasan posonginan do tuhun.”

Ontok pinapalati i Pope Francis diho tema do “Ikot doid dogo, saviavi kou ii avagat-kalaja om adaa do vinagat-kalaja, om onuan ku mai izioho do koundaangan,” pinosoto disido iho boos di Kristus, kokomoi doid vinakas piisaan, koinsasamadan om kahansanan montok do tuhun toomod togumu, ii tangasampit, kitoluo, momimidouso ngaavi, sontob dii zaazadaan om adaa do undang-undang om kalaalahano do pononoto koundoso. Ii kosian om koinsasamadan di Jesus pointindapou nopo, ka di Pope, nga gumapus no kozo do potitikid tuhun, do ingkuo noopo o kohidasan dioho, ais oi tootohiban, nga momohoou do potitikid tuhun do magi id koposizon Dau om momiumon do koginavaan Dau tohuud.

Nunsub ponogi di Archbishop ii tuhun ngaavi diho paroki do manambayang dii sontob kitoluo o koduuduvo om nogi tinan do “koiho om monoimo nodaa izioho do lati do koundasaan om toluo, om sompuuvon no izioho doid di Mamaamasi, ii pinougad di Tama do ‘manaak do pibabasan, muuhuzung miaga do bavang, ii kobantugan dii tinaau ngaavi/pogun ngaavi”.

Mantad boos ngaavi di Kristus, koiho tokou do kilati om kihoogo o toluo montok do kopomasizan dotokou sondii om di pomogunan. Koiho tokou nogi do i Kristus sondii, saasau do minonombuhui om minomohingongon dii kitoluo ngaavi, ginavo Disido izioho do id toluo dioho.

Hizoon kozo di Eklizia do papataak ii Sakramintum do Kopongumaan kumaa doid, dii kitoluo ngaavi, Katolik nongopodsu, ii id kohigaganan tu sabap no do toluo (sumakit) toi nohoing, om doid dii minsosomok domonoimo do kapamazazakan toi nazazakan no.

Oongou dotokou do mantad dii inait (sambayang) diho sakramintum nokomoi, do manaak iho do grasia di Spiritu Tobitua kumaa doid sontob dii kitoluo, om maza diho grasia, asakadai om atampasi ii tuhun: “Maza diti kopongumaan tobitua, i Tuhan, do id koginavaan om kosian Dau, manakadai diau miampai do grasia di Spiritu Tobitua.

I Tuhan, papagabas nodaa diau mantad douso, manampasi diau om mangakat popoinsavat diau.” – CS