Pason Tadau Malaysia 2021

HIMO NGOOPOD OM VAHU’ toun nakatahib, ontok 16 September 1963, nohodi’ i Malaysia. Monongkotohuod tokou di Kinoingan tu’ id diho’ tounan ngaavi’ , kapapatahang iti pogun do aanu i’ monuidong o pogun do tuhun togumu’ tinaau’ om ugama.

Aiso i’ koompuvangan, do koubasanan togumu’, pokionuon ngaavi’ om hizab ngaavi’ diho’ 32.7 lizong tuhun diti pogun, nopo nga’ nakapanaak do kosimbaagatan do id kopiomungan tinaau’ togumu’ om kopogionitan ugama, om kivaa vookon timpu’ ngaavi’ do nokointutuk doid vookon simbaagat-ginavo ngaavi’. Nga’, ozoon i Kinoingan, tu’ kogiiginovoo’-tohumis om ii sunduvan do katabazan o pinopohombus dotokou do muzu. Kanou sumambayang do ii pihumaagan nopiumanan dotokou nopo nga’ tumihombus mai’ do ingkaa nopo do maso tokou muzu doid dii ningkokoton do pogun notunda’ poimponu’

Iti no ii toun kumoduvo do Tadau Malaysia nopo nga’ lamazon do uha-uha’ noopo, kogumuan do ii tapatut noopo. Iho’ pandemic (Covid 19) nopo nga’ minangabos dotokou dii kalamazan no kozo, ii kointahang i’ daa maza’ do kopiombohutan om kopiumahan-sosiol ngaavi’.

Miampai diho’ koingkavason do kaantakan ngaavi’ positif om vaza-talaat diho’, pinohisang tokou di Covid 19 om minangasak iho’ do vinakas, asil om kotoinaan dotokou. Kobuubuzuo’ do kohidasan dotokou songavian nga’ nagazat doid gontob dii om iho’ id dumbangan ngaavi’ nga’ nohuus. Iho’ boogizan ikonomi nga’ noundoso tadahaan om ogumu’ natagakan kalaja’ om pongindopuan. Miaga diho’ ii-iho’ no, ii lahan do kopibaasan, humansan kozo doid tiknoloji kapaabalan, iho’ kopiboosan digital do tuhun ngaavi’ diti pogun nga’ muzu kumivang, hobi-kozo no do id piahatan do uvang ngaavi’ habus-kadazan om id kakadazan. Piahatan-ginavo id politik dotokou id dumbangan nga’ au’-kapapaapu tavaavasi’ doid ningkokoton, ii nosimbaagatan no.

Iho’ pandemic (Covid 19) nopo nga’ minomohumpatiu do koposizon dotokou. Kivaa do au-kotantuan ngaavi’ do id potitikid hivang do koposizon. Doid kogumuan, iho’ kootulan-tonudon-kavavagu ngaavi’ nopo nga’ “okonko-miaga-koubasan” tu’ poinsuusuvai-kozo iho’ do mantad ko’ ii sandad do tuhun sabaagi tuhun-vinangun sosiol.

Iti nodii ii kovoovozoo’ do ingkaa no o Tadau Malaysia do maan lamazo’ id diti toun. Ingkuo po, nga’ kiguno do mingkavas-sumoibau tokou om mogium do lahan ngaavi’ ponovohi do popokito do topiipiumanan dotokou do koposizon-pogun hobi-kozo no do kumaa’ doid kotonduhionon om pisompuuvan kabansaan.

Sabaagi ongotumbazaan, kanou maahing doid di Tuhan do mogium do koinsasamodan om kabaahan Disido. Ii scripture sinuat 1 Corinthians 2:9-12; poposoou dotokou i St. Paul do mambasa’ dii tanda’ ngaavi’ dii timpu’ ngaavi’ maza’ do maahing doid di Spiritu di Kinoingan, ii “monoungkou doid potitikid-konunu, ii potuu inahom ngaavi’ do tuddu ngaavi’ di Kinoingan”. Ii ponginaman ngaavi’ om koukotan ngaavi’ duopuson dotokou sabaagi tosoosonguhun, paganakan toi’ pogun nopo nga’ somoonu’ do id tahib do kopomolotian dotokou. Doid kokoozon pointantu’, nopongihaan sosiol dotokou mogovit dati’ dotokou do mongintutun dii gamut ngaavi’ dii kinokookoozo’ ngaavi’. Nga’ sahagi-ngau’ poinsavaton dotokou o pomumusoou om kumaa’ tokou doid kotumbazaan dotokou do manakadai dotokou do dumuapus do id diti timpu’ toukot, iho ‘mgitootondos’ nga’ mogovit mai’ dotokou doid aiso- kokoozon.

Sabaagi mokiki’ia’ ngaavi’ di Kristus, hoovon tokou do dumadi do “tusi’ di tana’ om ninavau di pomogunan”. Ponoovohi do manaau’ di totuvong, kanou no tosoosonguhun dotokou do popoikit do dian dotokou sondii’ om songavian kaanu tokou do mogium do lahan humabus.

Sumambayang zou do miampai dii sakadai di Spiritu Tobitua, adadi o Tadau Malaysia do iso’ kaantakan do mamadadi do pisuvazan. Id-nombo do doiho’ o vudut ngaavi’ om pomomoduung, kanou umagko doid kotopotan om inuhi’. Nombo do doiho’ o kababaazat om kopomohusian, kanou pokitanai o kopohiongan om kopomohiongan. Nombo do doiho’ o pogoloolo’ om kopomogunaan-kahasa’, kanou mingkakat togiot om mongumohig do vinasi-ngaan do kotuhunan do potitkid-tuhun, nunu-noopo o votik- kuhit om kotumbazaan. Nombo o vinakas au-avasi’ do id moinan, kanou ahao’ dotokou izioho’ miampai vinakas do koginavoan.

Poovito’ no o koginavoan dotokou montok do tuhun ngaavi’ om pogun dotokou do ii tavasi’ kozo id dotokou do maso tokou muzu mamanau dumuapus om pointahib diho’ pandemic COVID-19.

I Kinoingan mambalakat di Malaysia!

Archbishop John Wong

Archdiosis Kota Kinabalu

READ this Message in English, Bahasa Malaysia , Chinese