PASON ADVEN 2020

Oi tobpinai ngaavi ku id di Tuhan

Otumbazaan zou do iziozu nga momusoou nogi do iti toun baino no dati o iso dii toun ngaavi noponu do ponginaman montok saviavi tokou. Soovon nopo ii di toun poguhu diti nga aiso i minomusoou do ingkaa iti toun baabaino. Mantad nopiumanan do nakatagakan do koginavaan, nasakatan do toluo, natagakan do kalaja, kobohingkaangan kousinan, natagakan do tuddu id koposizon om miad-iad nopo om opusakan-ginavo, nga totootopot no kozo do toun do kobohingkaangan om kosusaan iti.

Oponginaman o koposizon dotokou, osuung doihuu id tisan o kotumbazaan dotokou. Kivaa dati momusoou do songian nodii do opupusan iti? Nunu po vagu o aantakan do toun tiiso? Nombo i Kinoingan? Au naku momohizo dotokou Isido? Pakaazan no dotokou doid timpu Adven, kanou no mokianu do kabaahan mantad di Kinoingan, tu ii batos ngaavi id Scripture nopo nga kabaahan nopo nga tomoimo oi’ium om okito dii mogium! (Wisdom 6: 12) Momoguno tokou do kabaahan do ingkaa no iho konunu ngaavi, mintong diho konunu ngaavi do ingkaa no iho do id tokito di Kinoingan, om do mamaamasi miampai do kotumbazaan. Ontok maganu tokou do timpu do sumononod id ginavo tokou, okito dotokou ii hongon di Kinoingan do kakal po do pingkalaja poingamung diho tongoukot om ponginaman ngaavi. Do maso tokou poingintong do mumugumu tikid tadau o kaantakan diho COVID-19. Om iho ohingasan do COVID do daasom sangadau nga ingkaa nogi o ginumu nung au no kohobi. Monginapai (momohingos) i Kinoingan, maza do hongon diho poingumbangan ngaavi do mongusap. Kada no do au tokou kokito diho om nga kanou no monongkotohuod. Namot do noumbak diho covid o atag ngaavi dotokou om nosuu tokou do tumindooi id hamin do id kogumuan timpu diti toun, kahansanan om sambayang ku nopo nga do ogumu dotokou o minomoguno diti timpu do totootopot do popioniit koinvagu do pionitan dotokou miampai di Tuhan, miampai do paganakan om koginavaan ngaavi dotokou. Songkuo nodii o ginazo do grasia nakataak doid dotokou, totootopot no do monongkotohuod tokou kozo, do id taatanga diho kobohingkaangan tagazo.

Nga dati do montok dotokou nopo, Katolik, nga ii toluo kozo nopo nga ogumu dotokou o au ‘Nakasambut’ doiho id panambazangan do id kogumuan timpu diti toun. Id dii sontoun no gisom baino, ogumu dotokou o Nakasambut ontok Oikaristia (Misa) doiho id panambazangan. Baino, noiduan tokou diho kosivatan tavasi om ogumu dotokou o kotindapu noopo nodii do Misa maza diho oitan do ‘screen’ om kasambut maza do kosunduvanan. Iti koinggaanan do au kougad doid panambazangan nopo, nodii, nga nakapamadadi dotokou do koinaanaai i doid kotumbazaan dotokou. Noubas tokou nodii doid pomusaavan do miaga koi nokotindapou i do Misa. Nga iti po nga grasia i montok dotokou do papagazo do hous om hangad dotokou di Kristus, om do au nodii monoonoimo po diho Sakramintum ngaavi.

Ogumu minudizo kokomoi diti toluo nokomoi, “Ukum mantad di Kinoingan nangku iti?” Guminavo dotokou Isido, om nookuo tu potumbazaan Disido iti koundasaan. Au tokou i ii-insan po do kaanu mamalati do lahan ngaavi di Kinoingan. Pomusaavan ngaavi Disido nopo nga okonko pomusaavan ngaavi dotokou, om lahan ngaavi Disido nopo nga okon nogi ko lahan ngaavi dotokou. Tu iho tavan nopo nga akavas ko iti tana, om ingkaa nogi do lahan ngaavi om pumusaavan ngaavi Disido nopo nga akavas ko lahan om pomusaavan ngaavi dotokou (Isaiah 55:8-9). Pomusaavan ngaavi dotokou nopo nga au i ii-insan po do kalati kozo do nookuo tu potumbazaan di Kinoingan iti. Ontok mintong tokou doid posoihi dotokou, opiumanan dotokou do miaga koi tumoob o padaau ngaavi dotokou, vookon kopiuman dati do miaga koi notinggoub no o padaau ngaavi dotokou. Nga tihombusan i di Kristus do momohoou dotokou om mongunonong doid Disido om do kivaa do kotumbazaan (Mark 4: 37-41). Isido o poingkuasa, om koiho Isido do nunu o muubuzu do posoihi dotokou om id dotokou.

Do maso tokou sumuang doid timpu adven do toumounda om umunsikou do Krismas, kanou no maganu timpu do momusoou taahom-ahom do duvo dii ‘Sangti Tindama kozo’ id di Eklizia, i Joseph om Mary. Ontok dii Kopoihaan, suminimba i Tina Tobitua dotokou doid di Tasab Gabriel miampai ditia boos ngaavi do simbanan i dosido o koposizon dosido om diti pomogunan, sohiihinaid. “Biio, izou no i suupu-tondu di Tuhan; pododizo no iti do oimaan doid dogo tumanud doid boos nu,” (Luke 1:38), poingiho do kotutukon om kihagaganan ngaavi aantakan. Kakal po, do iso nopo dii nimaan ngaavi dosido dii ontok poinggontizan nodii zosido di Kristus, nga papabaagi do kaandasan Disido ontok do minonombuhui zosido di pinsan dosido, Elizabeth. Aiso i au-kotontuan toi koosi do kaanu mongidu dii kaandasan di Kristus do montok songuhun ii ahansan id di Kinoingan.

I Joseph, dii nokoiho nodii do nopihi di Kinoingan i Mary do mogontizan dii Iso Tobitua kozo, nokopiuman do au kosudong do maganu di Mary, iso ii pavazaan di Kinoingan dii iso Poinggonop om Obitua kozo. Nga kointahang nopo, dii tasab, doid disido, do id nipi, pinopogiot doid disido do kada koosizai do maganu di Mary sabaagi sinavaan dau (di Joseph), tu i Mary nopo nga poinggontizan maza do kuasa di Spiritu Tobitua (Mt 1:20). Ohuduk kozo i Joseph do minonoimo dii hizab di Kinoingan om tuminaak i Joseph doid dii hizab (palan) di Kinoingan do dumadi do tama dii Tanak Dau id diti pomogunan.

Popotounda montok kohodion di Mamamasi diti pomogunan, nopo nga aiso do komozon do ahal no toomod. Duuduvo, i Joseph om Mary, id kohudukan om kouhanan toomod, nopo nga miaga nogi kozo dotokou. Minonoguvang izioho do ponginaman togumu om okon i ko izioho o minangazu dii ngaavi. Nga huminansan izioho, pinapataak do potitikid konunu ii kivaa dioho, om tuminaak doid dii hizab di Kinoingan do id potitikid haang dii lahan. Sundung do nokoduumak izioho do ogumu o koukotan om tataangob ngaavi poingangob id tindahanon dioho, saviavi ii do minogovit dioho doid tizonon, ii au i dati dioho nosoosoou, ii tizonon tohuduk kozo – ponunumadan-sapi, Doiho no, do nohodi i Kristus. Nokointahang doid di Joseph om Mary ii palan (atag) di Kinoingan tu tuminaak izioho om naavi-ginavo dioho do humansan doid di Kinoingan.

Ontok intongan dotokou iho ponginaman ngaavi, katatabon ngaavi, koukotan ngaavi otoguvang dotokou id diti pomogunan baino, au tokou i kaanu-anu po do monoguvang diho, do miampai vinakas dotokou sondii. Kotohuodan no kozo, do okon i ko osoosondiian tokou! Nunsub tokou di Kristus, do id Boos Dau, do momuginavo kozo, tu naaha Disido i Pomogunan. (John 16:33)

Saasau do tungagon di Tuhan i sangti ngaavi do id timpu tosusa kozo om noponu do ponginaman. Kanou no minsingiho do mintong miampai dii mato do kotumbazaan om minggisom montok kobituahan. Kanou no papatantu do koinsomokan di Kristus doid dotokou do id diti timpu tosusa om ponginaman. Kanou no tumihombus monuhuk do koposizon id sambayang ii manakadai dotokou do mongunonong di Kristus maza diti timpu ngaavi nokomoi om id dii kahansanan do kakaton tokou Disido do dumadi do sangti ngaavi do baino.

Iti Adven, miaga tokou nodaa di Mary om Joseph, papataak do potitikid konunu ii kivaa dotokou, do popotounda montok dii kohodion di Kristus id ginavo ngaavi dotokou maza do humansan om papataak do saviavi kumaa doid dii hizab di Kinoingan. Ii hangad dotokou di Kristus, mazo-gazo nodaa do maamaso tokou tumounda montok Kohodion Disido. Ivango dotokou o ginavo ngaavi dotokou mooi do oovit tokou di Kinoingan doid pinanau kumaa doid Krismas. Maza dii ponginaman ngaavi, koukotan om au kotontuan ngaavi, dii kotontuan do Isai i Kinoingan, tumindooi do ii-om-ii. Koginavaan Isido. Emmanuel Isido, poinginsomok dotokou, maza do saviavi diti.

Adven tobitua!

Archbishop John Wong